Պաղեստինյան ինքնավարությունը ժամանակավորապես կասեցրել էր հողերի գրանցման գործարքները այն անձանց համար, որոնք ունեն Իսրայելի քաղաքացիություն կամ Երուսաղեմի բնակության իրավունք։ Այս մասին հայտնում է The Jerusalem Post-ը։
Որոշումը հաջորդել էր Երիքովի մերձակայքում հրեա ակտիվիստների կողմից ութ տան ձեռքբերմանը։ Պաղեստինյան ինքնավարությունը կասկածել էր, որ իսրայելցի հրեաները գույքը ձեռք են բերել արաբ իսրայելցիների աջակցությամբ։ Գործարքների սահմանափակումը ժամանակավոր է եղել և այժմ արդեն վերացվել է։
Պաղեստինյան օրենսդրությամբ՝ հողերի վաճառքն ու վարձակալությունը իսրայելցի հրեաներին համարվում է դավաճանություն և կարող է պատժվել խիստ պատժամիջոցներով, այդ թվում՝ ցմահ ազատազրկմամբ։
Երուսաղեմի հանրային կապերի կենտրոնի փորձագետ Մորիս Հիրշի գնահատմամբ՝ այս մոտեցումը հակասական է․ Պաղեստինյան ինքնավարությունը արաբ իսրայելցիներին համարում է պաղեստինցիներ, սակայն Իսրայելի քաղաքացիությունը կամ Երուսաղեմի բնակության իրավունքը հիմք է դարձնում նրանց գույքային գործարքները սահմանափակելու համար։
Հրապարակման մեջ նաև նշվում է, որ ութ տները գտնվում են C գոտում, որը գտնվում է Իսրայելի քաղաքացիական և անվտանգության լիակատար վերահսկողության ներքո։ Հետևաբար, Պաղեստինյան ինքնավարության տարածքային իրավասությունը չի տարածվում այդ տարածքի վրա։
