Արհեստական բանականության ոլորտի ընկերությունների բաժնետոմսերը ուրբաթ օրը վերականգնվել են երկօրյա կտրուկ անկումից հետո՝ նպաստելով Ուոլ Սթրիթի կորուստների մասնակի կրճատմանը։ Այդուհանդերձ, ԱՄՆ ֆոնդային շուկան շաբաթն ավարտել է զգալի անկմամբ, իսկ համաշխարհային շուկաներում ևս տատանումները շարունակվել են․ փոխանցում է Associated Press-ը։
S&P 500 ինդեքսն աճել է 0.3 տոկոսով՝ շաբաթվա ընդհանուր կորուստը հասցնելով 2.7 տոկոսի։ Սա ինդեքսի համար ամենավատ շաբաթական ցուցանիշն էր 2025 թվականի ապրիլից ի վեր։ Nasdaq Composite-ն աճել է 1.1 տոկոսով, մինչդեռ Dow Jones Industrial Average-ը նվազել է 0.5 տոկոսով՝ կորցնելով 237 կետ։
Արհեստական բանականության ոլորտի խոշոր ընկերություններից Nvidia-ի բաժնետոմսերն աճել են 2.8 տոկոսով՝ նախորդ երկու օրերին գրանցված անկումից հետո։ Աճել են նաև տվյալների կենտրոնների կառուցման հետ կապված մի շարք ընկերությունների բաժնետոմսեր։ IREN-ի բաժնետոմսերը թանկացել են 20 տոկոսով, Lam Research-ինը՝ 8.2, CoreWeave-ինը՝ 6.3, իսկ Micron Technology-ինը՝ 5.1 տոկոսով։
Շուկայի անկման պատճառներից մեկը ԱՄՆ միջանկյալ ընտրություններից հետո արհեստական բանականության ոլորտի նկատմամբ կարգավորումների խստացման հավանականությունն է։ Դեմոկրատների հաղթանակները որոշ նահանգներում մտահոգություններ են առաջացրել, որ կարող են դանդաղել տվյալների կենտրոնների կառուցման ծրագրերը։ Բացի այդ, ներդրողները կասկածի տակ են դնում ոլորտի ընկերությունների բարձր գնահատականներն ու մեծածավալ ներդրումների ֆինանսավորման հնարավորությունները։
Ասիական շուկաներում անկումն առավել կտրուկ էր․ Հարավային Կորեայի Kospi ինդեքսը նվազել է 7.4 տոկոսով, Ճապոնիայի Nikkei 225-ը՝ 5.7 տոկոսով։ Եվրոպայում Գերմանիայի DAX ինդեքսը կորցրել է 1.9 տոկոսը։ Այս տատանումները հաջորդել են Ուոլ Սթրիթում հինգշաբթի գրանցված անկմանը։
Միևնույն ժամանակ, ԱՄՆ-ում հրապարակված տնտեսական տվյալները ցույց են տվել, որ գործատուները հոկտեմբերին սպասվածից ավելի շատ աշխատողներ են ընդունել։ Սա վկայում է տնտեսության դիմադրողականության մասին, սակայն կարող է նաև ուժեղացնել գնաճային ճնշումները։ Տվյալների հրապարակումից հետո շուկայի մասնակիցներն ավելի հավանական են համարել, որ Դաշնային պահուստային համակարգը դեկտեմբերին կբարձրացնի կարճաժամկետ տոկոսադրույքը։
Պարտատոմսերի շուկայում ԱՄՆ 10-ամյա գանձապետական պարտատոմսերի եկամտաբերությունը բարձրացել է մինչև 4.86 տոկոս։ Միաժամանակ Միչիգանի համալսարանի հարցումը ցույց է տվել, որ ամերիկացի սպառողների տրամադրությունները բարելավվել են, իսկ առաջիկա տարվա գնաճի սպասումները՝ նվազել։
