ԱՄՆ նախագահ Դոնալդ Թրամփը հինգշաբթի քննադատել է միջանկյալ ընտրությունների ընթացքը՝ դրանք անվանելով «կեղծված», և պահանջել Ալյասկայում դեռևս չհաշված ձայները փոխանցել հանրապետական գործող սենատորին։ Այս մասին նա հայտարարել է Սպիտակ տան Օվալաձև աշխատասենյակում լրագրողների հետ զրույցում՝ փոխանցում է France 24-ը։
«Մեր ընտրություններն այնքան կեղծված են, որ դուք նույնիսկ պատկերացում չունեք», – ասել է Թրամփը՝ միաժամանակ դատապարտելով Լոս Անջելեսի քաղաքապետի ընտրություններում դեմոկրատ սոցիալիստի հաղթանակը։
Նախագահի հայտարարությունները հնչել են ԱՄՆ միջանկյալ ընտրություններում դեմոկրատների խոշոր հաղթանակից երկու օր անց։ Ընտրությունների արդյունքում դեմոկրատները վերահսկողություն են ստացել Կոնգրեսի երկու պալատներում՝ զգալիորեն ամրապնդելով իրենց դիրքերը։
Թրամփը սկզբում ընդունել էր ընտրությունների արդյունքները, սակայն հետագայում պահանջել է Ալյասկայում Սենատի ընտրություններին մասնակցած երկու փոքր կուսակցությունների թեկնածուների օգտին տրված ձայները փոխանցել հանրապետական գործող սենատոր Դեն Սալիվանին, որը զիջում է մրցակցին։
Ալյասկայում դեմոկրատ թեկնածու Մերի Պելտոլան ստացել էր ձայների 48.2 տոկոսը, իսկ հանրապետական գործող սենատոր Դեն Սալիվանը՝ 47.9 տոկոսը։ Թրամփը Truth Social սոցիալական ցանցում գրառմամբ պնդել է, որ մեկ այլ՝ նույն անունն ունեցող Դեն Սալիվանի և Ջերալդ Հայքսի օգտին տրված ձայները պետք է անմիջապես փոխանցվեն «իսկական» Դեն Սալիվանին։
ԱՄՆ նախագահը հայտարարել է, որ դա ընտրությունների արդյունքների արդարացի լուծման միակ տարբերակն է։
Միևնույն ժամանակ, Միսիսիպի նահանգում Սենատի ընտրություններում անսպասելի հաղթանակի շեմին է դեմոկրատ թեկնածու Սքոթ Քոլոմը։ Նա առաջ է անցել հանրապետական գործող սենատոր Սինդի Հայդ-Սմիթից՝ 1724 ձայնով, իսկ վերջնական արդյունքը դեռևս կարող է մի քանի օր պահանջել։
Քոլոմի հաղթանակի դեպքում նա 1982 թվականից ի վեր առաջին դեմոկրատը կլինի, որը Սենատի տեղ կստանա Միսիսիպիից, ինչպես նաև 1874 թվականից ի վեր առաջին աֆրոամերիկացին։
Ընդհանուր առմամբ, դեմոկրատներն արդեն ապահովել են Սենատի առնվազն 54 տեղ՝ հանրապետականների 44-ի դիմաց։ Ներկայացուցիչների պալատում նրանց առավելությունը հինգշաբթի գերազանցել է 250 տեղը։ Սա կուսակցության լավագույն արդյունքն է վերջին շուրջ երկու տասնամյակում։
Սենատի դեմոկրատական փոքրամասնության առաջնորդ Չակ Շումերը զգուշացրել է, որ եթե Թրամփը հաջորդ մեկ տարվա ընթացքում վետոյի իրավունքով արգելափակի գների նվազեցմանն ու կոռուպցիայի դեմ պայքարին ուղղված օրինագծերը, ապա հանրապետականների համար 2028 թվականի ընտրությունները կարող են շատ ավելի ծանր լինել։
Միջանկյալ ընտրություններում դեմոկրատները մի շարք պատմական հաղթանակներ են գրանցել։ Քեյշա Լենս Բոթոմսը դարձել է Ջորջիայի և ԱՄՆ պատմության մեջ առաջին սևամորթ կին նահանգապետը, իսկ Միչիգանից Աբդուլ Էլ-Սայեդը՝ Սենատ անցած առաջին մուսուլմանը։
Դեմոկրատ Ջեյմս Տալարիկոն հաղթել է Տեխասում՝ խախտելով նահանգում 38 տարի շարունակվող հանրապետականների գերակայությունը, իսկ Ադամ Համիլթոնը դարձել է Կանզասից ընտրված առաջին դեմոկրատ սենատորը վերջին 94 տարում։
Օհայոյից հանրապետական կոնգրեսական Ուորեն Դևիդսոնը պարտության պատճառների թվում նշել է Թրամփի՝ Իրանի դեմ ամիսներ շարունակվող պատերազմն ու համաշխարհային առևտրային պատերազմները։ Նրա խոսքով՝ հատկապես երիտասարդ ընտրողներն իրենց դավաճանված են զգացել։
