Կառավարության 2026 թվականի հոկտեմբերի 29-ին հավանության արժանացած նախագծով 2027 թվականից 300 000 դրամ աշխատավարձից մաքուր կմնա 213 200 դրամ՝ ներկայիս 219 200-ի փոխարեն, եթե աշխատողն արդեն ընդգրկված է առողջության համընդհանուր ապահովագրության համակարգում։ Նրա աշխատավարձից կպահվի ապահովագրավճարի ամբողջ դրույքաչափը՝ 10 800 դրամ՝ ներկայիս 4 800-ի փոխարեն։ Իսկ նրանք, ում աշխատավարձը 2026 թվականի նոյեմբերին եղել է մինչև 200 000 դրամ և 2027 թվականին կանցնի 200 000-ը, կվճարեն 4 800 դրամ, և նրանց մոտ 300 000 դրամից մաքուր կմնա 219 200 դրամ։
Ինչպես տեղեկացնում է Iravaban.net-ը, նախագիծը փոփոխություններ է նախատեսում «Առողջության համընդհանուր ապահովագրության մասին» օրենքի 45-րդ և 46-րդ հոդվածներում։ Կառավարությունն այն համարել է անհետաձգելի և որոշել է ներկայացնել Ազգային ժողով։ Նախագիծը դեռ ընդունված չէ։
Ումի՞ց կպահվի 10 800 դրամ
Նախագծով օրենքի 46-րդ հոդվածը լրացվում է 9.2-րդ մասով, որով 2027 թվականի հունվարից ապահովագրավճարի ամսական դրույքաչափի 100 տոկոսը՝ 10 800 դրամ, վճարման ենթակա է այն աշխատողների համար, ովքեր համակարգում ընդգրկվել են օրենքի 45-րդ հոդվածի 1-ին մասի 3-րդ կամ 4-րդ կետով։ Դրանք այն աշխատողներն են, որոնց աշխատավարձը որևէ մեկ գործատուից 200 001 դրամ և ավելի է եղել 2025 թվականի նոյեմբերին կամ 2026 թվականի հունվարից նոյեմբեր ընկած ժամանակահատվածի որևէ ամսում։ Նախագծի տրամաբանությամբ՝ այս խմբում են մնում նաև նրանք, ում աշխատավարձը հետագայում նվազել է, քանի որ նրանք արդեն ունեն ապահովագրված անձի կարգավիճակ։
Ումի՞ց կպահվի 4 800 դրամ
Նոր 9.1-րդ մասով 4 800 դրամ կպահվի այն աշխատողներից, ովքեր մինչ այդ ապահովագրված չեն եղել, 2026 թվականի դեկտեմբերի 25-ի դրությամբ ներկայացված նոյեմբեր ամսվա հաշվարկներով յուրաքանչյուր գործատուից ունեցել են մինչև 200 000 դրամ աշխատավարձ, իսկ 2027 թվականի հունվարին կամ հաջորդ ամիսներին նրանց աշխատավարձը կկազմի 200 001-ից մինչև 500 000 դրամ։ Մնացած 6 000 դրամը կվճարի պետությունը. նախագծի 17.1-րդ մասով բյուջեից փոխանցումը նախատեսված է 2026 թվականի դեկտեմբերի և հաջորդող տարվա համար։ 500 001 դրամ և ավելի աշխատավարձի դեպքում երկու խմբի համար էլ վճարման ենթակա է ամբողջ 10 800 դրամը (9.1-րդ մասի 4-րդ կետ և 9.2-րդ մաս)։
Որքա՞ն կմնա մաքուր
Կուտակային կենսաթոշակային համակարգի մասնակցի համար՝ 20 տոկոս եկամտային հարկով, 5 տոկոս սոցիալական վճարով և 1 000 դրամ դրոշմանիշային վճարով, 4 800 և 10 800 դրամ ապահովագրավճարի դեպքում ամսական մաքուր կմնա.
- 250 000 դրամից՝ 181 700 կամ 175 700 դրամ,
- 300 000 դրամից՝ 219 200 կամ 213 200 դրամ,
- 400 000 դրամից՝ 294 200 կամ 288 200 դրամ,
- 500 000 դրամից՝ 369 200 կամ 363 200 դրամ։
Ամփոփում
Ամփոփելով՝ նախագծի ընդունման դեպքում 2027 թվականից 200 001-ից մինչև 500 000 դրամ աշխատավարձից կպահվի 10 800 դրամ, եթե 2025 թվականի նոյեմբերին կամ 2026 թվականի հունվարից նոյեմբեր որևէ ամսում որևէ գործատուից աշխատավարձը եղել է 200 001 դրամ և ավելի, և 4 800 դրամ, եթե նախկինում ապահովագրված չեք եղել, իսկ 2026 թվականի նոյեմբերին ձեր աշխատավարձը յուրաքանչյուր գործատուից եղել է մինչև 200 000 դրամ, – տեղեկացնում է Iravaban.net-ը։
Թե որքան կմնա մաքուր մինչև 200 000 դրամ աշխատավարձից 2027 թվականից, կարդացեք այս նյութում։
Ծանուցում. սույն նյութը պատրաստված է միայն իրավական իրազեկման նպատակով և չի հանդիսանում իրավաբանական խորհրդատվություն։
